اجابة لكل تسائلات طلبة و أولياء أمور عن الدبلومة الأمريكية

في  الفترة دي من كل سنة بتجيلنا أسئلة كتير من طلبة و أولياء أمور عن الدبلومة الأمريكية

وهي هي نفس الأسئلة كل سنة مبتتغيرش  

  1. نحول أمريكان ولا نخلينا في ثاوية عامة؟
  2. نحول أمريكان إمتى؟ 
  3. الامريكان سهل و لا صعب؟ 
  4. هو الأمريكان ماث و أنجلش بس فعلاً ولا في مواد تانية؟ 
  5. هما طلبة الأمريكان بيدخلوا جامعات حكومية ولا لازم جامعات خاصة؟ 
  6. و هل في طلبة من الأمريكان بتدخل طب و هندسة و صيدلة ولا أخرهم بيزنس و تجارة و حقوق 

في البوست ده أنا هجاوبك على كل الأسألة دي

و بعد ما تفهم كل حاجة … هيبقى القرار قرارك 

1- فكرة انك تحول أمريكان ولا تخليك في ثانوية عامة دي بتعتمد على ظروفك و قدراتك 

قدراتك كولي أمر من الناحية المادية 

و قدرة الطالب من الناحية الأكاديمة … اللي هي التحصيل الدراسي.  

زي ماحنا عارفين الثانوية العاملة بتبقى سنة طويلة كلها مذاكرة من أولها لأخرها 

و دروس و سنتر و اونلاين و مصاريف ومشاوير و رايح و جاي 

وكل ده طبعاً بيترجم لأرقام و مصاريف 

و في النهاية هي فرصة واحدة هتحدد مصيرك 

ويا إما جيبت المجموع اللي نفسك فيه 

يا إما هتجيب مجموع أقل 

وفي كلتا الحاليتن خلاص هي كانت فرصة واحدة 

و غالباً محدش بيعيد ثانوية عامة ويضيع سنة من عمره عشان مجموعه مكانش أد كده 

في الامريكان الموضوع مختلف 

طبعاً في مذاكرة و دروس وأونلاين وسنتر 

بس مش من أول السنة لأخرها 

و مش في وقت معين من السنة 

لأن امتحان الدبلومة الأمريكية اللي هو الإيست أو الأكت متاح 6 مرات في السنة 

يعني لو طالب في جريد 10 اللي هي أولى ثانوي … ممكن يدخل مرة 

و لما يطلع جريد 11 ممكن مرتين أو تلاتة كمان 

ولو لسا محققش النتيجة اللي نفسه فيها 

أدامه 6 محاولات في جريد 12 يقدر يدخل منهم اللي هو عاوزه 

و طبعاً ده مش معناه ان الطالب لازم يدخل كل المحاولات دي 

لأنه لو حقق النتيجة اللي هو عاوزها من أول أو تاني أو تالت مرة 

 خلاص مش محتاج يدخل تاني  

2- أنا عن نفسي بفضل ان الطالب يحول امريكان من أول جريد 9 اللي هي تالتة إعدادي أو جريد 10 اللي هي أولى ثانوي

و ده طبعاً عشان الطالب ميتضغطش 

و يبقى عنده فرصة يفهم النظام و يتعود عليه قبل ما يوصل لجريد 12 اللي هي أخر سنة 

لكن لو طالب حول في جريد 11 مفيش مشكلة 

هيكون لسا أدامه سنيتن يفهم ويتعود على النظام 

أما لو طالب ظروفه حكمت انه يحول أمريكان عل جريد 12 لسبب ما أو لأخر

برضو لا بأس … ولكن لازم ياخد الموضوع جد من أوله و ميضيعش دقيقة من وقته 

لأنه للأسف مبيكونش أدامه فرص كتير زي اللي حول من جريد 10 أو 11 

و في حالة لو الطالب حول امريكان من جريد 12 يبقى لازم يبدأ كورسات تأسيس في الماث و الإنجلش فوراً

 و يدخل أول محاولة إيست أو أكت بالكتير في شهر 10

و لو حصل و حقق النتيجة اللي نفسه فيها من أول مرة يبقى كتر ألف خيره 

محصلش … يبقى لسا أدامه مرتين او تلاتة كمان على مدار السنة يقدر يستعد تاني و يدخل تاني 

معلش هي هتبقى سنة مضغوطة شوية 

بس انت وشطارتك و اجتهادك 

في إيدك تستعد صح و تخلص بدري بدري 

أو انك تستسهل و تستهتر

 و تفضل تدخل في محاولات و تضغط على نفسك وتضيع وقت و مصاريف إنت أولى بيها 

نصيحتي ليك ياللي هتحول أمريكان من جريد 12 … متضيعش وقت …. إبدأ فوراً  

3- لو قارنت بين الأمريكان و أي نظام تاني من حيث عدد المواد اللي فعلاً بتحتاج مذاكرة بجد  … الأمريكان يكسب 

 أهم 3 مواد في الأمريكان هي الماث و الانجلش و البايولوجي 

أما لو قارنت من حيث صعوبة المادة العلمية نفسها 

هتلاقي ان حاجة زي جزء الريدنج في امتحان الإنجلش في الأمريكان 

أصعب من أصعب امتحان ممكن تتخيله 

أنا عن نفسي درست سات و أكت و إيست و أيلتس و توفل و أي جي و غيرهم كتير 

وملقيتش في صعوبة الريدنج بتاع امتحانات الأمريكان

و دايماً جزء الريدنج في امتحانات الإيست أو الأاكت أو السات 

بيكون التحدي الأكبر لكل طلبة الأمريكان 

حتى الطلبة الأمريكان نفسهم اللي مولودين وعايشين في امريكا 

مش كلهم بيجيبوا درجات عالية في الريدنج رغم ان انها لغتهم الأم

و السبب باختصار ان اختبارات الأمريكان بشكل عام و جزء الريدنج بشكل خاص 

بتعتمد في الأساس على مهارات … مش بس حفظ كلمات ولا مذاكرة دروس و مناهج كتير

انا مش بخوفك … هو الموضع أي نعم صعب شوية لكنه مش مستحيل 

لو بدأت في الوقت الصح … مع الناس الصح …. و عملت الصح … كل ده هيبقى سهل و بسيط  

4- لو بتحضر في مدرسة نظامية يبقى هتدرس المواد العادية جداً اللي بتدرس في أي مدرسة 

زي الانجلش و السوشيال ستاديز و الماث بكل فروعه 

الساينس بكل فروعه 

وطبعاً العربي والدين والمواد القومية 

و لغة تانية زي فرنش أو جيرمان 

و أكيد في أرت و بي إي و كل المواد العادية المتعارف عليها في كل أنطمة التعليم المختلفة 

لكن طبعاً اللي بيفرق هي طبيعة المواد دي بما يتناسب مع طبيعة الدبلومة الأمريكية 

و المواد اللي هتدرسها في حصص المدرسة مع مدرسين المدرسة هي المواد اللي بتاخد بيها درجات ال GPA

وال GPA  باختصار هي درجات المواد اللي بتدرس في المدرسة 

و اللي بتساهم بنسبة 40% من مجموع درجاتك في الدبلومة الأمريكية بشكل عام 

و ال 40 % دول بيكونوا تحت سلطة المدرسة بالكامل 

و المدرسة هي اللي بتقيم كل طالب و تحدد هو يستاهل كام من نسبة ال 40% 

أما ال 60% الباقيين دول بيجوا من الامتحانات الدولية 

زي الإيست أو الأكت أو السات 

و المدرسة ليس لها أي علاقة بيهم 

ال 60% دول مسؤلية الطالب كاملةً 

هو اللي عليه يختار المواد 

و يحدد معاد الامتحان اللي يناسبه 

و يذاكر و يستعد و يحجز ويمتحن 

و يجيب الدرجات ويوثقها و يقدم بيها في التنسيق بعد كده 

كل ده … مسؤلية الطالب و ولي أمره .. فقط … بعيداً عن المدرسة 

أما لو انت طالب هوم سكولينج ومبتروحش مدرسة أصلاً 

في الحالة دي يبقى درجات الجي بي إيه بتخضع للنظام اللي المدرسة بتشتغل بيه 

سواء كنت هتمتحن أونلاين أو هتروح المدرسة على الامتحانات فقط 

أو أي طريقة تانية بتحددها المدرسة نفسها 

لأن زي ما قولنا قبل كده … ال %40  جي بي إيه دول تحت سلطة إدارة المدرسة بالكامل 

و ليس عليهم أي رقيب في الموضوع ده … غير ربنا سبحانه وتعالى 

5- الجامعات الحكومية ال 27 على مستوى الجمهورية بتحدد نسبة 5% لطلبة الشهادات المعادلة 

وخلي بالك … ال5% دي لكل الشهادات المعادلة 

اللي هي كل شهادات الثانوية المعادلة للثانوية العامة 

يعني الأي جي و الأي بي و الأمريكان والفرنش و الجيرمان و الكانيديان و كل الشهادات التانية غير الثانوية العامة 

كلهم على بعضهم ليهم نسبة 5% من المقاعد في الجامعات الحكومية 

يعني ممكن تلاقي ان الأمريكان ليه نسبة 2 أو 3 % فقط 

طب هل النسبة دي كافية انها تستوعب كل طلبة الأمريكان ؟ 

أحب اطمنك … أيوة … و كافية جداً كمان 

السنة اللي فاتت على سبيل المثال تقدم للجامعات الحكومية من مختلف الشهادات 112240 طالب في المرحلة الأولى فقط من التنسيق

و لو  حسبت نسبة ال 5% من الرقم ده … هيطلع 5612 

عدد طلاب الشهادات المعادلة مجتمعين كان حوالي 7000 

منهم حوالي 3200 طالب من الدبلومة الأمريكية لوحدها 

احسبها انت مع نفسك وشوف في أماكن للأمريكان في الجامعات الحكومية ولا مفيش 

و عشان اوفر عليك التفكير … أيوة في … و في كتير كمان 

بس بشرط …. انك تجيب المجموع اللي يأهلك انك تدخل جامعة حكومية 

وإلا … عليك و على الجامعات الخاصة بقى و دول مفيش اكتر منهم دلؤتي 

6- لو ركزت كويس في الجزء اللي فات 

هتعرف ان وارد جداً ان طالب الأمريكان يدخل طب و هندسة و صيدلة في جامعات حكومية زي عين شمس و القاهرة و غيرهم 

بشرط انه يكون جايب المجموع اللي يأهله للجامعات دي 

و عايز اقوللك ان وزارة التعليم العالي المصرية

 كل سنة بتعلن عن الحد الأدنى لشروط الالتحاق بالجامعات والمعاهد العليا الحكومية 

بكل أفرعها و كل تخصصاتها لطلبة الدبلومة الأمريكية زيهم زي أي شهادة تانية 

يعني لما نعرف ان الوزارة أعلنت و بشكل رسمي 

في مؤتمر صحفي أنا حضرته بنفسي 

ان الحد الأدني للقبول في كلية طب جامعة القاهرة لخريجي الدبلومة الأمريكية هو 117.3% 

ده معناه إيه … اتفضل … أهلاً و سهلاً بيك … هات المجموع المطلوب … زيك زي كل زمايلك من خريجي الشهادات الأخرى … و يا مرحب بيك

 

*للحجز والاستفسار من خلال واتساب: 

 *Dr.Ahmed Hassan*  *SAT ACT EST EMSAT AP Calculus* http://wa.me/+201117658521

تابع د/ أحمد حسن على: 

الفيسبوك جروب :

https://web.facebook.com/groups/1890260264629533

جروب تليجرام:

.https://t.me/DrAHMEDHASSANSATMATH

صفحة فيسبوك:

https://www.facebook.com/drahmedhassansatact/

تيك توك:

 https://www.tiktok.com/@drahmedhassansatact

إنستجرام:

https://www.instagram.com/drahmedhassansatact/



Leave a Comment

Your email address will not be published. Required fields are marked *

Shopping Cart
Scroll to Top
Scroll to Top
💬 تواصل معي مباشرة